Претседателот на Туркије во вторникот вети дека ќе го реконструира јужниот регион на земјата по силните земјотреси што се случија претходно овој месец.
„Ќе работиме со сите сили да ја забрзаме урбаната трансформација во нашите градови и да го надминеме периодот во кој зградите се урнаа, а луѓето останаа под урнатини. Со завршувањето на активностите за отстранување на отпадот, започнуваме со реконструкција и заживување на нашиот регион“, рече Реџеп Таип Ердоган на брифинг со новинарите во провинцијата Кахраманмараш, епицентарот на земјотресите од 6 февруари.
„За неколку месеци започнуваме со изградба на 309.000 куќи, вклучително и куќи во селата, низ зоната на земјотресот“, додаде тој.
На 6 февруари, земјотреси со јачина од 7,7 и 7,6 степени по Рихтер погодија 11 провинции - Адана, Адијаман, Дијарбакир, Елазиг, Хатај, Газиантеп, Кахраманмараш, Килис, Малатија, Османије и Шанлиурфа. Повеќе од 13 милиони луѓе во Туркије се погодени од разорните земјотреси, како и многу во северозападна Сирија.
Ердоган повтори дека научниците ја нарекуваат катастрофата „исклучителен природен настан“.
„Додека ги оживуваме провинциите, областите и селата во регионот погодени од земјотресот, брзо ќе ги трансформираме другите делови од нашата земја кои се соочуваат со истата закана“, рече тој.
Претседателот, исто така, ја предупреди јавноста дека последователните потреси сè уште продолжуваат и ги повика да избегнуваат оштетени згради, додавајќи: „Очекуваме нашите граѓани да бидат повнимателни во овој поглед“.
