За Туркије, земја која е позиционирана на важна географска локација, неопходно е да се има робусна, силна дипломатија, изјави турскиот претседател Реџеп Таип Ердоган.
„Лоцирана во срцето на три континенти, Туркије не може да биде набљудувач на случувањата. Да се биде силен на теренот и на маса не е опција за нас, тоа е обврска“, рече Ердоган во обраќањето вчера пред турските амбасадори кои служат во странство и во земјата.
Амбасадорите се собраа во главниот град Анкара на 14. Амбасадорска конференција за да разговараат за регионалните и меѓународните случувања, глобалните трендови и најновите предизвици и можности.
„Ние работиме за заштита на интересите на Туркије со користење на сите алатки на дипломатијата и сите елементи на тврда и мека моќ“, рече Ердоган.
„Туркије стана 'земја плејмејкер', која остави свој белег во меѓународните односи, чија вклученост се бара при многу клучни прашања и чиј став внимателно се следи“, додаде турскиот претседател.
Осврнувајќи се на борбата против тероризмот, Ердоган рече дека Туркије не направила чекор назад пред лицето на терористичките организации, меѓу кои и АСАЛА и ПКК.
„Не фрливме дамка на нашата независност и иднината во борбата против тероризмот“, додаде тој.
„Операциите на Туркије ќе продолжат сѐ додека не се искорени терористичкото зло што го загрозува територијалниот интегритет на Туркије, како и на Ирак“, порача Ердоган.
„Доброволното враќање на сириските бегалци, кои престојуваат во Туркије, во нивната земја ќе биде забрзано со стабилизирање на Ирак и Сирија“, додаде тој.
Над 3,7 милиони Сиријци моментално живеат во Туркије, што ја прави најголемата земја во светот по бројот на примени бегалци.
Договорот за извоз на жито преку Црното Море
„Туркије е клучна земја во решавањето на руско-украинската криза“, рече Ердоган, додавајќи дека Анкара следи „урамнотежен и праведен“ став уште од првиот ден за решавање на проблемот.
„Разговорите на Анкара со страните се во тек за продолжување на договорот за извоз на жито во Црното Море“, додаде Ердоган.
За неговиот неодамнешен телефонски разговор со рускиот претседател Владимир Путин, Ердоган рече дека имал можност повторно да добие информации за барањата и очекувањата на Русија од прва рака.
„Путин, како и ние, е чувствителен во однос на пристапот на нашите африкански браќа до житните производи. Верувам дека можеме да најдеме заеднички јазик по ова прашање“, додаде турскиот претседател.
На 17 јули, Русија го суспендира своето учество во договорот, што го потпиша во јули 2022 година заедно со Туркије, Обединетите нации и Украина за продолжување на извозот на жито од украинските пристаништа преку Црното Море, што беше прекинат од почетокот на руско-украинската војна во февруари минатата година. Москва се пожали дека рускиот дел од договорот не се спроведува.
„Несомнено, решението на овој проблем без понатамошен застој зависи од западните земји и нивното исполнување на своите ветувања“, нагласи Ердоган.
Туркије, меѓународно пофалена за нејзината единствена улога на посредник меѓу Украина и Русија, континуирано ги повикува Киев и Москва да ја прекинат војната преку преговори.
Борба против исламофобијата
Во врска со неодамнешните провокативни дејствија и палењето примероци од Куранот во некои западни земји, Ердоган рече дека Туркије ќе ја продолжи својата борба против исламофобијата.
„Треба да вложиме повеќе напори за борба против исламофобијата, која достигна неподносливо ниво во некои европски држави во последните недели“, додаде тој.
Исламофобични поединци или групи организираа јавно палење на Куранот и слични обиди за сквернавење во Северна Европа во последните месеци, предизвикувајќи гнев кај муслиманските земји и светот.
„Примарна должност на сите нас како Турци и муслимани е да спречиме напади врз Куранот и да се погрижиме сторителите на овие злосторства од омраза да бидат казнети онака како што заслужуваат.“
„Всушност, станавме една од земјите кои дадоа најсилен и најефективен одговор на ова варварство, кое од ден на ден станува сѐ побезобѕирно“, нагласи Ердоган.
Покрај тоа, тој рече дека Туркије се стреми во овој поглед да ги мобилизира сите меѓународни организации во коишто членува.
„Туркије ќе ја исполни својата одговорност да биде пионер во оваа борба, како што го прави тоа со векови“, нагласи турскиот претседател.
„Зона на мирот и стабилноста“
„Целта на Анкара е да воспостави зона на мир, стабилност и просперитет околу себе“, изјави Ердоган, и нагласи дека дијалогот и дипломатијата ќе бидат најважните алатки за постигнување на оваа цел.
„Ние сакаме уште повеќе да го зголемиме бројот на нашите пријатели. Немаме нерешливи проблеми со никого, особено со нашите соседи“, додаде тој.
Турскиот претседател исто така рече дека Туркије има една од петте најголеми дипломатски мрежи во светот со 260 претставници.
„Го проширивме хоризонтот на нашата надворешна политика за да го покрие целиот свет. Ги зајакнавме нашите односи со фокусирање на региони кои беа запоставени многу години, како што се Африка, Латинска Америка и Азија“, додаде Ердоган.
