Туркије ќе продолжи да работи со Индонезија во напорите за обнова на Појасот Газа по повеќе од 15 месеци немилосрдни израелски напади, изјави во средата турскиот претседател Реџеп Таип Ердоган.
Претседателот на Туркије се наоѓа во официјална посета на Индонезија, каде што беше пречекан со сите почести од страна на претседателот на оваа земја, Прабово Субјанто.
По свечената церемонија двајцата претседатели одржаа тет-а-тет средба и средба на делегации. Претседателот Ердоган и Субјанто претседаваа со Првиот состанок на Советот за стратешка соработка на високо ниво меѓу двете земји по што се одржа церемонија на потпишување 12 договори во различни области.
Туркије и Индонезија потпишаа договори во областа на веронауката, енергетиката, здравството, одбраната, трговијата, земјоделството, инвестициите и други полиња.
Пофалувајќи го ставот на Џакарта за палестинското прашање на заедничката прес-конференција со неговиот колега, претседателот Прабово Субианто, Ердоган ја изрази намерата на Анкара „да продолжи да работи со Индонезија во обновата на Газа“.
Тој, исто така, го обнови својот повик за формирање на суверена палестинска држава, со главен град Источен Ерусалим.
„Воспоставувањето на суверена и територијално недопрена палестинска држава врз основа на границите од 1967 година, со Источен Ерусалим како главен град, не може дополнително да се одложува“, додаде тој.
Ердоган тврди дека другите земји во регионот нема да можат да постигнат стабилност додека Газа и Палестинците не најдат мир.
„Вкупната штета предизвикана од 15-месечните напади на Израел е речиси 100 милијарди долари. Според правните принципи, оваа штета треба да се наплати од сторителот“, рече тој, мислејќи на Израел.
Ердоган и Субианто, исто така, најавија планови за зајакнување на односите меѓу нивните земји преку трговија и соработка во многу сектори.
„Разговаравме за плановите да ја прошириме нашата билатерална трговија на 10 милијарди долари и да ја направиме избалансирана“, додаде турскиот претседател.
„Ние сме решени да го зајакнеме партнерството меѓу Индонезија и Туркије“, рече Прабово, истакнувајќи ја важноста на соработката.
Прабово ја нагласи заедничката цел за зајакнување на врските со одбранбената индустрија.
„Сакаме дополнително да ги поддржиме напорите за соработка во одбранбената индустрија меѓу Индонезија и Туркије. 2050 година е важна пресвртница во подготовките за стогодишнината од партнерството Индонезија-Туркије“.
Туркије беше една од првите нации што ја призна независноста на Индонезија. Дипломатските односи беа воспоставени во 1950 година, а турската амбасада во Џакарта беше отворена во 1957 година.
