Туркије е задоволна од развојот на соработката со САД, изјави вчера претседателот на Туркије, Реџеп Таип Ердоган.
„Разрешивме поголем дел од нашите пречки во текот на разговорот со (претседателот Џо) Бајден и одлучивме да водиме и други разговори“, рече Ердоган по средбата на тркалезната маса со претставниците на тинк-танк организациите во Њујорк, каде што турскиот претседател учествува во Генералното собрание на ОН.
Турскиот лидер рече дека Туркије и САД ја зајакнале соработката во борбата против тероризмот, кој е закана и за двете земји.
Во поглед на поддршката на САД на терористичката организација ЈПГ/ПКК во северот на Сирија, Ердоган нагласи дека не може да има партнерство со терористички групи.
„Секој развој на настаните во нашиот регион покажува колку е погрешна разликата меѓу добрите и лошите терористи. Со терористи не се преговара и не може да се воспостави пријателство или партнерство“, рече Ердоган.
Ердоган во своето обраќање го спомена и придонесот на Туркије во решавањето на глобалните и регионалните проблеми, промовирањето на мирот, стабилноста и просперитетот во регионот, како и решавањето на неправдите во рамките на меѓународниот систем.
Осврнувајќи се на војната во Украина, Ердоган рече дека Анкара активно работи на ставање крај на судирите со воспоставување праведен и траен мир. Тој ја нагласи посветеноста на Туркије на дипломатијата како средство за воспоставување траен мир во сите конфликтни подрачја и за проширување на својата мрежа на меѓународни пријателства.
Претседателот на Туркије го истакна и значењето на меѓународната солидарност, особено во борбата против терористичките групи, како што се ПКК, ДЕАШ и ФЕТО.
Тој ја нагласи и потребата за достоинствено и безбедно враќање на сириските бегалци во матичната земја.
Ердоган истакна дека во критичниот период во кој се наоѓа светот „гледа рамка на можности за заживување на односите меѓу Туркије и ЕУ“.
Претседателот на Туркије престојува во Њујорк, каде што ќе учествува на 78. седница на Генералното собрание на ОН.
