Претседателот на Република Туркије, Реџеп Таип Ердоган изјави дека во разорните земјотреси минатиот месец што го погодија јужниот дел на земјата, повеќе од 214.000 згради се срушени или значително оштетени.
„Во моментов е утврдено дека имаме 608.000 независни секции во 214.000 згради кои се урнати или се тешко оштетени и сите ќе бидат отстранети“, рече Ердоган на состанокот во Истанбул со високи турски претставници, вклучително и потпретседателот Фуат Октај, претседателот на парламентот Мустафа Шентоп, директорот за комуникации Фахретин Алтун и министери во Владата.
Ердоган исто така рече дека прецизната бројка на згради и куќи што повторно ќе се градат во регионите погодени од земјотресот ќе се знае откако проценката ќе биде готова.
Турскиот претседател рече дека новите згради нема да имаат повеќе од три или четири ката и воглавно во нив ќе бидат трисобни станови.
„Нашата цел е да ги оживееме нашите градови со разбирање што ќе ги одржува живи нашите историски и културни добра и исто така ќе ги зајакне против катастрофи“, рече Ердоган, додавајќи дека населбите ќе бидат преместени од рамните котлини кон ридесто и цврсто тло.
Повеќе од 45.000 луѓе загинаа како резултат на земјотресот што на 6 февруари ги погоди јужните региони на Туркије. Станува збор за два земјотреси со јачина од 7,7 и 7,6 степени со епицентар во провинцијата Кахраманмараш, а во деновите потоа се регистрирани околу 12.000 последователни потреси.
