Европската унија во петокот ја осуди вчерашната резолуција на израелскиот парламент со која се спротивставува на формирањето на палестинска држава, нагласувајќи дека решението за две држави останува единствениот остварлив пат кон мирот и безбедноста на Блискиот Исток.
„Постои силен консензус во меѓународната заедница дека единственото одржливо решение што ќе донесе мир и безбедност на Блискиот Исток е решението со две држави“, се вели во соопштението на блокот.
ЕУ ја потврдува својата заложба за постигнување траен мир преку решение со две држави, како што е наведено во резолуциите 2735, 2728, 2720 и 2712 на Советот за безбедност на ОН, обезбедувајќи дека и Палестинците и Израелците можат да живеат во безбедност и достоинство, се вели во соопштението.
Блокот останува на својот став дека не ги признава промените на границите од 1967 година, освен ако двете страни не се согласат.
„Ќе продолжиме да работиме активно со меѓународните и регионалните партнери за да го заживееме политичкиот процес за таа цел. Кредибилен пат кон палестинската државност е клучна компонента на тој политички процес. Никаква надеж, никаков хоризонт за палестинскиот народ само ќе го продлабочи конфликтот “, велат од ЕУ.
