Високиот претставник за надворешна и безбедносна политика на ЕУ Жозеп Борел, денеска го покани израелскиот министер за надворешни работи на ад хок состанок на Советот за асоцијација ЕУ-Израел.
Поканата доаѓа откако министрите за надворешни работи на ЕУ минатата недела се согласија да свикаат состанок на кој ќе се разговара за усогласеноста на Израел со неговите обврски за човекови права од Договорот за асоцијација ЕУ-Израел.
Во февруари, шпанскиот премиер Педро Санчез ја повика ЕУ итно да го разгледа договорот за да истражи дали се почитуваат суштинските точки на односите за човековите права и демократските принципи“.
Тие предложија доколку се утврди дека Израел ја прекршил својата обврска, Советот на ЕУ да преземе соодветни активности.
Договорот за асоцијација ЕУ-Израел, кој стапи на сила во 2000 година, обезбедува правна и институционална рамка за политички дијалог и економска соработка меѓу ЕУ и Израел.
Членот 2 од договорот вели дека се заснова на почитување на човековите права и демократските принципи, дефинирани како суштински елемент на пактот.
Според Европската комисија ЕУ е најголемиот трговски партнер на Израел, со 28,8 отсто од нејзината трговија со стоки во 2022 година.
Шпанскиот дневен весник „Ел Паис“ пишува дека трговијата е еден од главните начини на кои ЕУ се надева да изврши притисок врз Израел за прекин на огнот во Појасот Газа, каде што израелските сили убиле повеќе од 36.000 Палестинци од нападот на Хамас на 7 октомври во кој загинаа 1 200 лица.
ЕУ го поддржува последниот договор за примирје предложен од САД.
„ЕУ ги повикува двете страни да го прифатат и исполнат предлогот од три фази и е подготвена да придонесе за заживување на политичкиот процес за траен и одржлив мир, заснован на решението за две држави и да поддржи координирани меѓународни напори за обнова на Газа“, се вели во вчерашното соопштение.
Не е одреден датум за оваа ад-хок средба за разгледување на договорот за асоцијација.
