ЕУ денес изрази „длабока загриженост“ поради наредбите на Израел за евакуација на луѓето од Кан Јунис во Газа, велејќи дека тоа „создава хуманитарна криза во рамките на кризата“.
Шефот за надворешна политика на ЕУ, Жозеп Борел, и комесарот за управување со кризи, Јанез Ленарчиќ, во заедничко соопштение рекоа дека не само што 250.000 луѓе биле погодени од овие наредби, туку тие исто така им се заканувале на пациентите и персоналот на Европската болница и ги принудиле да се преместат во други установи.
„Оваа одлука за евакуација сигурно ќе ја влоши пренатрупаноста и ќе предизвика сериозен недостиг во веќе преполните преостанати болници во време кога пристапот до итна медицинска помош е критичен“, рекоа Борел и Ленарчиќ.
„Принудните евакуации создаваат хуманитарна криза во рамките на кризата. Тие ја влошуваат и онака катастрофалната хуманитарна ситуација, со речиси 1,9 милиони жители на Газа раселени во Појасот, како што изјави високиот координатор на ОН за хуманитарна помош и реконструкција за Газа, Сигрид Каг, во Советот за безбедност“, се вели во соопштението.
Тие истакнаа дека нема капацитети за сместување на луѓето, а хуманитарните партнери се борат да ги задоволат огромните потреби на новораселените.
„Европската Унија повторува дека за евакуациите да не претставуваат забранети принудни трансфери, тие мора да се усогласат со Меѓународното хуманитарно право, гарантирајќи безбедност при транзитот и соодветно сместување во засолништата за Палестинците повикани да се евакуираат“, велат тие.
Тие го потсетија Израел на неговата одговорност да гарантира дека раселените лица ќе можат да се вратат во своите домови или области на вообичаено живеење откако ќе завршат непријателствата.
„Раселените лица исто така треба да имаат пристап до потребните услуги и да им се задоволат потребите“, додаваат тие.
Тие истакнаа дека ЕУ ги мобилизирала сите свои одговори на кризата и хуманитарни алатки за да ја насочи потребната помош за Газа.
„Примирјето сега е уште поважно и ќе овозможи пораст на хуманитарната помош за Газа, како и ослободување на сите заложници“, рекоа тие.
Тие, исто така, побараа имплементација на наредбите на Меѓународниот суд на правдата од 26 јануари и 24 мај, бидејќи тие се „правно обврзувачки“.
