Турскиот министер за надворешни работи Хакан Фидан денеска ги осуди оние што му аплаудираа на израелскиот премиер Бенјамин Нетанјаху во американскиот Конгрес, нарекувајќи ги поддржувачи на „крвавиот злосторник“.
Оние кои му аплаудираа на Нетанјаху влегоа во историјата како поддржувачи на „крвавиот злосторник“, означувајќи целосен колапс на моралните стандарди на кои сведочи целото човештво, објави Хакан Фидан на Х.
И покрај воените злосторства во Газа, Нетанјаху доби овации од американските пратеници кога дојде да се обрати на заедничката седница на Конгресот, настојувајќи да добие поддршка за неговата смртоносна војна против Газа.
Коментарите доаѓаат во време на ескалација на бомбардирањето на израелските сили на Појасот Газа, каде што бројот на загинатите се приближи до мрачната бројка од 40.000. Конфликтот резултираше со хуманитарна криза, при што милиони Палестинци ги загубија своите домови и беа принудени да избегаат.
„Бројот на мачениците во Газа се приближи до 40.000. Милиони Палестинци ги загубија своите домови и мораа да мигрираат. Верувам дека сите израелски функционери, вклучително и Нетанјаху, кои се архитекти на оваа ситуација, еден ден сигурно ќе одговараат пред правдата “, смета Фидан.
