Турскиот министер за надворешни работи, Хакан Фидан, денес ги повика сите регионални актери да преземат улога во постигнувањето траен мир во конфликтот меѓу Палестина и Израел.
На заедничката прес-конференција со својот ирански колега Хосеин Амир-Абдулахиан во Анкара, Фидан рече дека треба да се развие неопходна платформа за да се разговара за сеопфатни мировни преговори.
Тој додаде дека меѓународната мировна конференција, веќе предложена од Туркије, би била соодветна платформа за која се разговара со пријателите и сојузниците.
Критикувајќи го пристапот на Европската Унија кон конфликтот меѓу Палестина и Израел, Фидан рече: „Поради заземениот колективен став, ЕУ, за жал, не сака да го слушне терминот прекин на огнот’ (во Газа).“
„Туркије не сака случувањата во Газа да се претворат во војна што ќе ги погоди другите земји во регионот“, додаде Фидан.
Неделава израелската војска ги прошири своите воздушни и копнени напади врз Појасот Газа, кој е под немилосрдни воздушни напади откако палестинската група на отпорот, Хамас, започна ненадејна офанзива во Израел на 7. октомври.
Шефот на турската дипломатија нагласи дека „не може да има различни стандарди, едни за Украина, други за Палестина“ и „ако сакаме праведен свет, мора секогаш да дејствуваме со интегритет и доследност“.
Тој соопшти дека е постигнат договор за евакуација на речиси 500 странски државјани од Газа и дека „во моментов се водат преговори за вклучување и на турските државјани“.
