Турскиот министер за надворешни работи, Хакан Фидан, ги повика членките на Г20 да играат поактивна улога во постигнувањето на прекинот на огнот во Појасот Газа.
Фидан присуствуваше на сесијата за улогата на Г20 во тековните меѓународни тензии на состанокот на министрите за надворешни работи на Г20 во Бразил, на која рече дека „бруталноста во Газа треба да се запре што е можно поскоро“.
Министерот Фидан ја охрабри меѓународната заедница и Г20 да го поддржат решението за две држави меѓу Израел и Палестина, соопштија неименувани дипломатски извори.
Коментирајќи ја војната во Украина, која трае веќе две години, Фидан рече дека Туркије се надева дека завојуваните страни ќе се свртат кон дипломатија и ќе постигнат решение. Шефот на турската дипломатија истакна дека Анкара ќе продолжи со иницијативите во таа насока.
Министерот Фидан во своето обраќање рече дека меѓународната заедница се соочува со многу предизвици, како што се глобалната нееднаквост и неправдата, економската ранливост, еколошките проблеми и вештачката интелигенција.
Тој ја истакна важноста глобалната дипломатија и Г20 да развијат заедничка иницијатива во сите кризни подрачја.
Фидан ги повика сите страни да работат на глобалниот мир и безбедност под слоганот „Истакнување на дипломатијата во спречувањето на кризите“, што ќе биде тема на Дипломатскиот форум во Анталија, што ќе се одржи од 1 до 3 март.
