Армијата на Франција во петокот соопшти дека е подготвена да одговори доколку обновените тензии во Нигер бидат насочени кон нејзините воени и дипломатски објекти во западноафриканската земја погодена од конфликт.
„Француската армија е подготвена да одговори на секоја повторна тензија што би ги таргетирала француските воени и дипломатски објекти во Нигер“, изјави францускиот Генералштаб во писмената изјава.
Во услови на тензии што се зголемија во неделите по соборувањето на демократски избраниот претседател на Нигер Мохамед Базум, Министерството за надворешни работи на воената администрација минатата недела му даде на францускиот амбасадор Силвен Ите 48 часа „да ја напушти територијата на Нигер“.
Амбасадорот Ите одби да се согласи и остана на својата функција, потег што беше поздравен од францускиот претседател Емануел Макрон.
Воената власт на Нигер нареди протерување на францускиот амбасадор во четвртокот во писмо упатено до француското Министерство за надворешни работи.
Ите „повеќе не ги ужива привилегиите и имунитетите поврзани со неговиот статус како член на дипломатскиот персонал на амбасадата“, соопшти воената администрација.
Нигер е во криза по 26 јули кога генералот Абдурахаман Тчиани, поранешен командант на претседателската гарда, ја предводеше воената интервенција со која беше соборен претседателот Базум.
