Над 500 демонстранти се приведени на протестите, кои се одржуваат низ целата земја од четвртокот, против реформата чија цел е да се зголеми старосната граница за пензионирање на 64 години во Франција.
Во различни градови во земјата се одржуваат демонстрации од 16 март, кога францускиот претседател Емануел Макрон, без гласање во владиниот Парламент, презеде чекор да ја спроведе пензиската реформа, што беше негово изборно ветување.
Протестите предизвикаа тензични моменти меѓу полицијата и демонстрантите што бараат Владата да се откаже од реформите.
Според податоците на локалните медиуми, бројот на приведени од четвртокот надмина 500.
Ослободени се 283 демонстранти, а деветмина од нив беа изведени пред обвинител.
Забраната за одржување демонстрации на плоштадот во близина на Парламентот во Париз продолжи и викендов.
Од друга страна, скршени се прозорците на канцеларијата на пратеникот и претседател на Партијата на централнодесничарските републиканци (ЛР), Ерик Чиоти, во Ница.
Чиоти најави дека неговата политичка група нема да гласа за предлогот за недоверба на Владата.
Противниците на реформата почнаа да организираат демонстрации откако премиерката Елизабет Борн се обиде да ја спроведе регулативата со користење на став 3 од член 49 од Уставот без да ја стави на гласање во Парламентот на 16 март.
