Кандидатот на коалицијата ЦДУ/ЦСУ за германски канцелар Фридрих Мерц прогласи победа на општите избори што се одржаа денеска во Германија, нагласувајќи дека ова е „историска изборна ноќ“ и дека коалицијата сака да го заврши формирањето на владата најдоцна до Велигден.
Тој за АРД изјави дека најдоцна во рок од осум дена сака да започне прелиминарни разговори за формирање коалиција, пренесува Дојче веле.
„Најдоцна по парламентарните избори во Хамбург, време е за интензивни разговори. Сакам најдоцна до Велигден да завршиме со формирањето на владата“, рече Мерц.
Според него, во случај на двопартиска коалиција, процесот може да биде побрз и нагласи дека ќе разговара со сите релевантни политички партии од демократскиот центар.
„Коалиција со АфД не доаѓа предвид. Тоа секогаш сум го велел. Оние кои гласаа за АфД го знаеја ова уште пред изборите и и покрај тоа гласаа за таа партија. Ќе дадам се од себе да формирам сојузна влада што ќе го претставува целото германско население. Ќе дадам се од себе да формирам влада што ќе ги реши проблемите на нашата земја. Трета година сме во рецесија и мораме да излеземе од неа“, рече Мерц.
Претходно вечерва во седиштето на партијата, веднаш по објавувањето на прелиминарните резултати, според кои коалицијата ЦДУ/ЦСУ освои 28,4 отсто од гласовите, Мерц рече дека е свесен за одговорноста и за нивото на задачите што му претстојат, додавајќи дека кампањата била многу тешка и допрела прашања од економската политика, миграцијата, надворешната и безбедносната политика.
Како што рече, уверен е дека наскоро ќе може да формира влада која ќе биде способна да дејствува во интерес на Германија.
„Светот надвор не чека нас и долги преговори“, рече Мерц, според Гардијан.
Според првите излезни анкети објавени од германските медиуми, Христијанско-демократската унија (ЦДУ/ЦСУ) предводена од Фридрих Мерц е во водство со 29 отсто од гласовите на предвремените парламентарни избори во Германија, додека на второ место, според прогнозите, на второ место е десничарската Алтернатива за Германија со 19,5 отсто, која бележи историски успех.
Социјалдемократската партија на поранешниот канцелар Олаф Шолц освои, според анкетите, 16 отсто од гласовите, што е нивен најлош резултат, јавуваат германските медиуми.
Зелените освоија 13,5 отсто од гласовите, додека партијата Левица се најде на петтото место со 8,5.
Излезноста беше 84 отсто.
Лидерот на СПД, Олаф Шолц го призна изборниот пораз на неговата партија и му честиташе на неговиот ривал Мерц за неговата победа на предвремените парламентарни избори во Германија.
„Ова е горчлив изборен резултат за Социјалдемократската партија и мора да се каже јасно и гласно“, рече Шолц во Берлин.
