Генералниот секретар на Обединетите нации, Антонио Гутереш, вчера ги осуди сите напади врз персоналот на ОН и повика на целосна истрага за убиството на член на персоналот во Појасот Газа.
„Генералниот секретар беше исклучително тажен кога дозна за смртта на припадник на Одделот за безбедност на ОН (ДСС) и ранувањето на друг член на ДСС кога возило на ОН беше нападнато додека патуваше кон Европската болница во Рафа“, изјави заменик-портпаролот на ОН, Фархан Хак, на прес-конференција.
Тој додаде дека Гутереш ги осудува сите напади врз персоналот на ОН и повика на целосна истрага за инцидентот.
Истакнувајќи дека ситуацијата во Газа не ги погодува само цивилите туку и хуманитарните работници, Хак рече дека шефот на ОН ги повторил барањата за итен хуманитарен прекин на огнот и ослободување на заложниците држени во Газа.
Хак рече дека ОН продолжуваат да собираат информации за инцидентот и додаде дека од 7 октомври досега во Газа се убиени 196 припадници на ОН.
Тој посочи дека ОН одржуваат контакти со официјални лица за да одговараат оние што се одговорни по завршувањето на конфликтот.
Запрашан дали возилото е означено со логото на ОН, Хак рече дека сите возила на меѓународната организација се означени.
