Генералниот секретар на ОН Антонио Гутереш изјави дека е „сериозно загрижен“ поради зголеменото насилство на окупираниот Западен Брег и кршењето на човековите права во Газа.
Во своето обраќање на 58-та седница на Советот за човекови права во Женева, Гутереш рече: „Силно сум загрижен од зголеменото насилство на окупираниот Западен Брег од страна на израелските доселеници и други прекршувања, како и повиците за анексија“.
„На окупираната палестинска територија, кршењето на човековите права вртоглаво порасна по ужасните напади на Хамас на 7 октомври и неподносливото ниво на смрт и уништување во Газа“, рече тој.
Опишувајќи го прекинот на огнот меѓу Израел и палестинската група Хамас како „несигурен“, тој повика: „Мораме по секоја цена да избегнеме обновување на непријателствата. Народот во Газа веќе претрпе премногу“.
„Време е за траен прекин на огнот, достоинствено ослободување на сите преостанати заложници, неповратен напредок кон решение за две држави, крај на окупацијата и формирање на независна палестинска држава, со Газа како составен дел“, додаде тој.
