Хамас ќе ги прекине преговорите со Израел преку посредници, ако Израел не ослободи 602 палестински затвореници кои треба да бидат ослободени во замена за шесте израелски заложници предадени вчера, изјави претставникот на Хамас, Махмуд Мардави.
Во објава на Телеграм, тој ги повика посредниците да извршат притисок врз Израел да ги спроведе одредбите од договорот за прекин на огнот, пишува Тајмс оф Израел.
Израелските власти рано утринава објавија дека го одложуваат ослободувањето на повеќе од 600 палестински затвореници како дел од размената со Хамас додека не добијат гаранции дека ќе бидат стопирани „понижувачките церемонии“ кои Хамас ги одржува при предавањето на заложниците.
Хамас рече дека тврдењето на израелските власти за „понижувачките“ церемонии за предавање на заложниците на Хамас е „лага и изговор за избегнување на обврските што произлегуваат од договорот за прекин на огнот во Газа!“.
Ослободувањето на палестинските затвореници беше дел од договорот за ослободување на шестмина израелски заложници, кои вчера беа предадени од Хамас.
Според првичниот договор, Израел вчера требаше да ослободи повеќе од 600 палестински затвореници, вклучително и повеќе од 100 жени и деца, како дел од седмата размена на заложници и затвореници за време на втората фаза од прекинот на огнот.
