Палестинската група Хамас денес соопшти дека палестинскиот народ нема да дозволи да продолжат плановите на американскиот претседател Доналд Трамп за протерување на Палестинците од Појасот Газа.
Негирајќи ги забелешките на Трамп дека жителите на Газа „немаат друг избор освен да си заминат“, високиот лидер на Хамас, Сами Абу Зухри, рече дека таквите изјави се „рецепт за создавање хаос и тензии во регионот“.
„Нашиот народ во Појасот Газа нема да дозволи овие планови да поминат“, рече Абу Зухри, додавајќи дека „она што се бара е да се стави крај на израелската окупација и агресија врз нашиот народ, а не да се протера од неговата земја“.
Исто така, Изат ал-Ришк, член на политичкото биро на движењето Хамас, рече дека изјавите на Трамп одразуваат „забуна и длабоко незнаење за палестинската кауза и регионот во целина“.
„Газа не е обично парче територија за која некоја страна може да одлучува за нејзината судбина; тоа е неразделен дел од окупираната палестинска земја“, рече Ал-Ришк.
Тој нагласи дека „секое решение мора да се базира на завршување на окупацијата и исполнување на легитимните национални права на нашиот народ, наместо на логиката на сила, доминација или менталитетот на трговец со недвижнини“.
Трамп за време на заедничката конференција со израелскиот премиер Бенјамин Нетанјаху рече дека САД сакаат да ја преземат контролата врз Газа, да ја исчистат областа од бомби и да ја обноват уништената инфраструктура.
Тој рече дека САД ќе го „преземат“ Појасот Газа и ја опиша својата визија за областа како нова „ривиера на Блискиот Исток“.
