Врховниот лидер на Иран, ајатолахот Али Хамнеи, во петокот рече дека искуството покажало дека разговорите со Соединетите Американски Држави „не се паметни, мудри или чесни“, објави официјалната новинска агенција ИРНА.
Американскиот претседател Доналд Трамп неделава рече дека би сакал да започне да работи на „потврден нуклеарен мировен договор“ со Иран, откако ќе ја обнови својата кампања за максимален притисок врз земјата.
За време на неговиот претходен мандат во 2018 година, Трамп ги повлече САД од нуклеарниот договор со Техеран од 2015 година со светските сили и повторно воведе санкции што ја осакатуваа иранската економија.
Острите мерки го натераа Техеран да ги прекрши нуклеарните ограничувања на пактот.
„Да се преговара со Америка не е ниту паметно, ниту мудро, ниту чесно. Тоа нема да реши ниту еден од нашите проблеми. Причина? Искуство!“, рече Хамнеи.
Иран постигна договор со САД и другите земји по двегодишни разговори, рече тој, но Американците не го почитуваа и покрај бројните отстапки од страна на Иран.
„Едно лице го прекрши“, рече Хамнеи, алудирајќи на Трамп.
Висок ирански функционер изјави за Ројтерс во средата дека Иран е подготвен да им даде шанса на САД да ги решат споровите.
Хамнеи рече дека Иран ќе возврати на ист начин доколку Американците го нападнат Иран.
„Ако тие ни ја загрозат безбедноста, ние ќе ја загрозиме нивната. Ако постапат по нивните закани, ќе го сториме истото“, објасни тој.
Осврнувајќи се на предлогот на Трамп за насилно преселување на палестинските жители од Газа во соседните арапски земји, Хамнеи рече: „На хартија, Американците ја менуваат мапата на светот. Се разбира, тоа е само на хартија, бидејќи е лишено од реалност“.
