Либанската милитантна група Хезболах денеска соопшти дека ако израелските сили не се повлечат целосно од Либан до недела, како што е предвидено во договорот за прекин на огнот, тоа ќе биде „еклатантно“ кршење на договорот.
Милитантната група рече дека извештаите за плановите за продолжување на военото присуство на Израел во Либан надвор од крајниот рок се повик до политичкото раководство во Либан да изврши притисок врз земјите кои го спонзорираат прекинот на огнот за да обезбедат негово спроведување, објави Ал Џезира.
Хезболах во соопштението нагласи дека либанската армија треба да може да се распореди на „секој сантиметар“ од Либан и дека жителите на областите кои моментално се под израелска окупација мора да можат брзо да се вратат во своите домови.
Договорот за прекин на огнот, постигнат во ноември минатата година по разорната војна во која Израел уништи големи делови од Либан и уби неколку високи политички и воени претставници на Хезболах, им даде на израелските војници 60 дена да се повлечат од Либан.
Од Хезболах се бараше да ги повлече своите сили северно од реката Литани, на околу 30 километри од границата со Израел.
САД и Франција беа главните посредници во постигнувањето на договорот.
