Американскиот претседател Доналд Трамп на својата платформа Вистина (Truth Social) напиша дека очекува наскоро да потпише договор за минерали за ретки земјени минерали со Украина.
Трамп разговараше со францускиот претседател Макрон и канадскиот премиер Џастин Трудо, кого Трамп повторно го нарече „гувернер“.
„Денеска во Овалната соба ми се придружи францускиот претседател Емануел Макрон. Состанокот го свика канадскиот премиер Џастин Трудо, актуелниот претседавач со Г7, по повод одбележувањето на третата годишнина од руско-украинската војна - која никогаш немаше да започнеше ако јас бев претседател. Сите изразија желба да се стави крај на војната, а јас ја истакнав важноста на виталниот „Договор за критични минерали“ меѓу САД и Украина, кој се надеваме дека ќе биде потпишан многу брзо!“, напиша Трамп.
Според него, овој договор, кој е „економско партнерство“, ќе му обезбеди на американскиот народ надомест за десетици милијарди долари и воена опрема испратена во Украина, а „истовремено ќе помогне и за раст на украинската економија додека оваа брутална и дива војна се приближува кон крајот“.
Трамп најави дека оваа недела ќе се сретне со Зеленски за да го потпише договорот.
„Ќе се сретнам со претседателот Зеленски. Всушност, тој може да дојде оваа или следната недела да го потпише договорот, што би било убаво. Би сакал да се сретнам со него. Ќе се сретнеме во Овалната соба“, им рече Трамп на новинарите додека беше домаќин на францускиот претседател Емануел Макрон во Белата куќа.
„Во исто време имам сериозни разговори со рускиот претседател Владимир Путин за завршување на војната, како и за големите трансакции за економски развој што ќе се случат меѓу САД и Русија. Разговорите се одвиваат многу добро!“, рече Трамп.
И украинскиот претседател Володимир Зеленски денеска изјави дека Украина и САД работат продуктивно на економскиот договор, кој е во центарот на напорите за ставање крај на руско-украинската војна.
Зеленски го објави ова од Киев за време на обраќање со видео-врска до лидерите на Г7, вклучително и американскиот претседател Доналд Трамп.
Зеленски повтори дека и Европа и Украина треба да бидат вклучени во мировниот процес.
„Што се однесува до Доналд Трамп... Само што разговаравме. Тоа беше многу добар разговор во рамките на состанокот на Г7 што го води Канада“, рече Зеленски, заблагодарувајќи ѝ се на Отава за организирањето на настанот.
Украинскиот претседател изрази надеж дека САД ќе ја задржат својата поддршка за Украина, нагласувајќи ја потребата да се зачува единството меѓу Вашингтон и неговите европски сојузници.
