Иранскиот претседател Масуд Пезешкијан во средата изјави дека Иран сака мир, но ќе одговори силно ако Израел возврати за ракетниот напад на Техеран.
„Ако Израел возврати, нашиот одговор ќе биде уште поостар“, рече Пезешкијан на прес-конференција во Доха, каде што присуствуваше на самитот на Азискиот дијалог за соработка (АЦД).
„Ние сме апсолутно против крвопролевање. Секогаш сме велеле: сакаме мир, сакаме мир. Не сакаме да се пролее крв во ниту една држава. Но, Израел не принудува да го направиме ова“, рече Пезешкијан.
Тој нагласи дека израелското убиство на лидерот на Хамас Исмаил Ханије во Техеран го принуди Иран да одговори.
„Ниту една земја или партија не може да го прифати тоа. Ниту еден регион не може да напредува во сенка на војната. Апелирам до Запад: Ве молиме повлечете го Израел назад, го ставивте Израел во срцето на овој регион. Вие исто така ја делите одговорноста за крвопролевањето“, изјави Пезешкијан.
Тој ја изрази својата посветеност на соработката со Катар за промовирање на регионалниот мир и стабилност.
Пезешкијан ги оцени разговорите со катарскиот емир Шеик Тамим бин Хамад Ал Тани како конструктивни, фокусирани на регионалниот мир и заедничките интереси и најави дека Иран и Катар ќе ја подобрат соработката во трговијата, енергијата и безбедноста.
„Гледаме дека ескалацијата на тензиите ќе има страшни последици за сите. Деескалирањето на оваа тензија е наш главен приоритет“, рече Ал Тани.
Тој додаде дека се согласуваат за формирање независна палестинска држава со главен град Ерусалим, нагласувајќи дека секое друго решение ќе резултира со неуспех.
