На седницата одржана во Даил, долниот дом на ирскиот парламент, беше прифатен необврзувачкиот предлог според кој Израел изврши геноцид во Појасот Газа.
На седницата се расправаше за предлогот „геноцид во Газа“, кој го покажува ставот на парламентот за едно прашање, но не е правно обврзувачки.
Говорејќи на седницата, ирскиот заменик-премиер и министер за надворешни работи и одбрана, Мајкл Мартин, рече дека ситуацијата во Појасот Газа останува причина за загриженост.
Истакнувајќи дека бројот на загинати во Појасот Газа надмина 43.000 луѓе, Мартин рече:
„Израелската војна во Газа е надвор од секој морален компас. Сведоци сме на колективно казнување на целото население и на целосно уништување на Газа“.
Мартин го повтори својот повик за итен прекин на огнот и ја истакна израелската забрана за активности на Агенцијата на Обединетите нации за помош и работа за палестинските бегалци на Блискиот Исток (УНРВА).
Наведувајќи дека тие се во разговори со меѓународните организации и истомислениците за да ја заштитат улогата што УНРВА ја игра за Палестинците, Мартин рече:
„УНРВА се соочува со системски напади од израелската влада“.
Тој нагласи дека ирското признавање на палестинската држава е важно за да му се покаже на светот солидарноста на Ирска со Палестина.
Осврнувајќи се и на случајот против Израел пред Меѓународниот суд на правдата (МСП), Мартин истакна:
„Како што веќе рековме, нашата влада планира да учествува во случајот инициран од Јужна Африка против Израел според Конвенцијата за геноцид.
Тој објасни дека одлуката е донесена по детална правна анализа, а ќе биде објавена до крајот на годинава.
Усвоениот необврзувачки предлог ја повикува ирската влада да ја прекине целата трговија со воена опрема со Израел, да спречи продажба на секундарни материјали, да ги затвори ирските аеродроми и воздушниот простор за авионите што носат оружје за Израел и да воведе патни, трговски и дипломатски санкции за Израел. .
