Израел ги засили своите напади низ Појасот Газа доцна во средата, непосредно пред да стапи на сила хуманитарната пауза во борбите меѓу израелските сили и борците на Хамас.
Израелската армија нападна неколку области низ Појасот Газа, особено во северните делови, објави официјалната палестинска новинска агенција ВАФА.
Се наведува дека голем број луѓе биле убиени во серија израелски воздушни напади врз станбени куќи во бегалскиот камп Нусејрат.
Агенцијата цитира локални извори дека израелската артилерија ја бомбардирала околината на училиштето Калифа во Беит Лахиа во северниот дел на Газа, каде што живеат повеќе од 8.000 раселени лица, оставајќи многу повредени.
Во градот Газа, израелски воени авиони ги нападнаа населбите Шеик Ридван и Шејаја.
Артилериско гранатирање беше забележано и во Ал-Фухари источно од Кан Јунис во јужниот дел на Појасот Газа и уште еден воздушен напад врз дом во Рафах во кој беа повредени најмалку три лица, соопшти ВАФА.
Последните напади се случуваат кога се очекува да стапи на сила хуманитарната пауза како резултат на посредништвото на Катар, Египет и САД меѓу Израел и палестинската група Хамас.
Во рамките на хуманитарната пауза, се очекува Хамас да ослободи 50 заробеници кои се држат во Газа, главно жени и деца, во замена за ослободување на палестинските жени и деца од израелските затвори.
Израел започна немилосрдни воздушни и копнени напади во Појасот Газа по ненадејниот напад на Хамас на 7 октомври.
Бројот на загинати во израелските воздушни и копнени напади врз Појасот Газа оттогаш се искачи на 14.532, вклучувајќи над 6.000 деца и 4.000 жени, соопшти во средата канцеларијата за медиуми во опколената енклава.
Во меѓувреме, бројот на загинати во Израел е околу 1.200, според официјалните бројки.
