Израелската армија денес принуди илјадници Палестинци кои побараа засолниште во болницата Насер во Хан Јунис, јужно од Појасот Газа, да заминат.
Очевидци изјавија дека израелската армија им наредила на раселените луѓе да ја напуштат болницата под огнот на израелските војници.
Армијата им нареди на раселените луѓе да ја напуштат болницата во една колона и да се упатат кон источните области на Хан Јунис.
Воените возила продолжуваат да ја опсадуваат болницата, а армиските булдожери ги уништуваат ѕидовите на болницата подготвувајќи се да упаднат во неа, додаваат очевидците.
Министерството за здравство во Газа вчера соопшти дека неколку Палестинци биле убиени од страна на израелската армија додека се обидувале да излезат од болницата Насер.
Од 22 јануари градот Хан Јунис доживеа масовна израелска копнена инвазија, принудувајќи десетици илјади жители на градот да ги напуштат своите области под силно израелско бомбардирање.
Во неделата шефот на Светската здравствена организација рече дека организацијата е длабоко загрижена за ситуацијата во и околу болницата Насер во Појасот Газа, кој е опколен од израелските сили.
„Длабоко сме загрижени за безбедноста на пациентите и здравствениот персонал поради интензивирањето на непријателствата во близина на болницата. Повторуваме: здравјето МОРА да биде заштитено во секое време“, рече Тедрос Гебрејесус на социјалната мрежа X, повторувајќи го повикот за прекин на огнот.
Од прекуграничниот напад на палестинската група Хамас на 7 октомври, при што загинаа околу 1.200 луѓе, во израелската офанзива врз Газа загинаа повеќе од 28.000 луѓе и се предизвика масовно уништување и недостиг на неопходни работи.
Според Обединетите нации, израелската војна против Газа принуди 85 отсто од населението на територијата внатрешно да се раселат поради акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.
Израел е обвинет за геноцид пред Меѓународниот суд на правдата, кој со привремената одлука во јануари му нареди на Тел Авив да ги запре геноцидните дејства и да преземе мерки за да гарантира хуманитарна помош за цивилите во Газа.
