Израелската армија во четвртокот наутро гранатираше неколку градови во јужен Либан, откако прекинот на огнот меѓу двете страни влезе во вториот ден, јавуваат локалните медиуми.
Официјалната либанска национална новинска агенција објави дека е извршено артилериско гранатирање на градовите Ајта ал Шааб и Бент Џбеил во јужен Либан.
„Цел на напад бил и автомобил во градот Маркаба, во кој беа повредени две лица“, објави државната агенција.
Се додава дека израелските тенкови истрелале гранати врз градот Вазани и предградијата на Кфаршуба во јужен Либан.
Израелски извидувачки авиони, исто така, летаа над областите Тир и Бент Џбеил во четвртокот наутро.
Израелската војска рано во четвртокот ги предупреди либанските цивили да се држат настрана од 10 села во јужен Либан до понатамошно известување, предупредувајќи дека секој што ќе ја премине линијата се изложува на ризик.
Договорот за прекин на огнот меѓу Израел и либанската група Хезболах со посредство на американските и француските дипломатски напори стапи на сила во средата во 4 часот по локално време.
Според договорот, либанските вооружени сили ќе се распоредат во јужен Либан во рок од 60 дена, а за тоа време Израел постепено ќе ги повлече своите преостанати сили.
Договорот бара и Хезболах да ги премести своите сили северно од реката Литани.
Повеќе од 3.800 луѓе се убиени во израелските напади во Либан, според либанските здравствени власти.
