Бројката на убиени Палестинци во израелските напади на Газа надмина 11.000, а израелската администрација за тие напади доби неограничена поддршка од САД, јавува Анадолу.
Официјалните лица на американската администрација ја користат реториката со која ги оправдуваат израелските напади на Газа по нападот на 7 октомври од страна на бригадите Касам, вооруженото крило на Хамас.
САД му даваат неограничена поддршка на Израел, кој ја предизвика смртта на над 11.000 цивили и ја уништи инфраструктурата, вклучувајќи и болници.
Американската администрација не го ни критикуваше, а камоли да го осуди Израел поради нападите врз Газа.
САД, кои не го искористија своето влијание за да ги запрат израелските напади на Газа, ѝ дадоа поддршка на Владата на израелскиот премиер Бенјамин Нетанјаху.
Право на одбрана
Во соопштението од 7 октомври, американскиот претседател Џо Бајден го бранеше правото на Израел на самоодбрана.
„Порачувам дека сме подготвени да им ја дадеме сета поддршка на израелската Влада и народ“, рече Бајден.
Американскиот државен секретар Ентони Блинкен на 8 октомври исто така рече дека „Израел има право да се брани“, а ја коментираше и можноста Израел да влезе во Газа.
„Не сакам да навлегувам во прашања што Израел може или не може да стори во Газа. На овој или оној начин, тие мораат да преземат мерки за да спречат нападот на Хамас да се повтори. Ниту од една земја не треба да се очекува да живее во страв. Факт е дека терористите ја преминале границата, влегле во домовите на луѓето, ги убивале среде улица, а некои од нив и ги заробиле. Ова е недозволиво во сите демократии. Израел мора да стори сѐ што може за да спречи ова да се повтори“, рече Блинкен.
САД го поддржаа Израел со воена помош
Во својот говор во Белата куќа на 10 октомври, додека продолжуваа израелските напади на Газа, Бајден отворено ги поддржа израелските напади во Газа, наместо да упати критики.
Тој истакна дека Израел има „должност да одговори“ на нападите на Хамас.
„Мораме да бидеме многу јасни во овој момент. Ние сме на страната на Израел. Ние на Израел ќе му пружиме сѐ што е потребно за да ги заштити своите граѓани, да се одбрани и да одговори на овој напад“, рече Бајден.
Тој порача и дека САД ќе продолжат да му испраќаат воена помош на Израел.
„Ќе се погрижиме клучните воени средства на Израел да не бидат исцрпени додека ги брани своите градови и граѓани“, додаде претседателот на САД.
- Бајден ги бранеше тврдењата на Израел
Бајден изнесе непотврдени тврдења дека Хамас им отсекувал глави на бебиња, со цел да ги поддржи израелските напади на Газа, при што рече дека видел и докази за тоа.
„На Американците им е важно да видат што се случува таму. Ја работам оваа работа многу долго. Никогаш не мислев дека ќе видат потврдени снимки од терористи како отсекуваат глави на деца“, рече Бајден во Белата куќа на 11 октомври.
Меѓутоа, официјалните лица од Белата куќа подоцна објавија дека Бајден не видел никакви докази за тоа.
Порака од Блинкен за Израел
Блинкен го посети Израел на 12 октомври, кога бројката на загинати Палестинци во Газа достигна 1.537 луѓе, од кои 500 се деца и 276 жени.
Блинкен, кој воопшто не ги коментираше убиените деца и цивили во Газа, често, во текот на средбите со Нетанјаху истакнуваше дека САД стојат покрај Израел.
„Јас сум денес тука, не само како државен секретар на САД, туку и како Евреин“, рече Блинкен, кој притоа во потполност ја игнорираше хуманитарната трагедија во Газа.
Притоа, Блинкен додаде дека донел јасна порака за Израел.
„Треба да бидете доволно силни за да се одбраните. Додека постојат САД, секогаш ќе бидеме покрај вас“, истакна Блинкен.
Бајден го поддржа Израел при посетата на Тел Авив
Американскиот претседател Бајден го посети Тел Авив на 18 октомври, ден откако израелската војска ја бомбардираше баптистичката болница Ал-Ахли во блокираниот Појас Газа.
Бајден во таа прилика воопшто не го осуди нападот на болницата.
„Бев многу тажен и лут поради вчерашната експлозија во болницата во Газа. Според она што го видов, за ова е одговорна другата страна, а не вие“, рече Бајден, обидувајќи се да го ослободи Израел од вината, иако немаше никакви докази.
Тој 18 октомври, додека Бајден беше во посета на Тел Авив, палестинското Министерство за здравство објави дека 3.478 луѓе се убиени во Газа, а повеќе од 12.000 се ранети во израелските напади.
Без црвена линија за Израел
Покрај тоа, американските официјални лица воопшто не повлекоа црвена линија за Израел во врска со убивањето цивили и воените злосторства и се воздржуваат од осуда на израелските напади.
Советникот за национална безбедност на Белата куќа, Џејк Саливан, на конференцијата за новинарите одржана во Белата куќа на 10 октомври, на прашањето дали САД имаат црвена линија кога во прашање е Израел, одговори со зборовите:
„Тука не сум да повлекувам црвени линии, да давам предупредувања или некому да му давам лекции.“
По повод тврдењата дека Израел користел забранети бомби со бел фосфор во нападите на Газа, Саливан на 15 октомври повтори дека негова должност не е да повлекува црвени линии.
Координаторот за стратешки комуникации на Советот за национална безбедност на Белата куќа, Џон Кирби, во изјавата дадена на 27 октомври рече дека бројката на убиени во Газа е зголемена на 7.326, од кои 3.038 се деца, и дека САД немаат црвена линија за Израел.
Кирби на 8 ноември повторно потврди дека САД немаат црвена линија за Израел, кога бројката на убиени Палестинци во Газа се зголеми на 10.569, од кои 4.324 се деца и 2.823 се жени.
Без ограничување на оружјето за Израел
Во моментите додека американската администрација ја продолжуваше активната поддршка на Израел во вооружувањето, САД не наметнаа никакви ограничувања од аспект на користењето на оружјето од страна на Израел.
На прашањето за употребата на оружјето испратено до Израел против цивилите, заменичката-портпарол на Пентагон, Сабрина Синг, на 30 октомври, кога бројката на убиени во Газа надмина 8.000, истакна дека немаат ограничувања во тој поглед.
„Не поставуваме никакви ограничувања за тоа како Израел ќе го користи оружјето што му е дадено. Во потполност ѝ е оставено на израелската војска како ќе го користи во своите операции. Не наметнуваме никакви ограничувања“, додаде Синг.
Реториката на Вашингтон
Почетната реторика на американската администрација за „безусловна поддршка“ што му се дава на Израел почна делумно да се менува откако беа убиени речиси 10.000 луѓе во Газа.
Во текот на втората посета на Израел на 3 ноември, Блинкен во своите изјави го потсети Израел на убиените цивили, но до тој датум бројката на убиени во Газа се приближи кон бројката од 10.000.
Блинкен тогаш нагласи дека „Израел има право да води воена операција против Хамас, но дека цивилите мора да бидат заштитени“.
Заменичката-портпарол на Пентагон, Синг, во изјавата дадена на 7 ноември избегна директни критики на сметка на Израел, но истакна дека оружјето од САД треба да се користи во согласност со меѓународното хуманитарно право.
Блинкен потоа во изјавата дадена во Њу Делхи на 10 ноември рече дека е потребно да се испорача хуманитарна помош во Газа.
„Премногу Палестинци досега загинаа, има премногу цивилни жртви во последните неколку недели. Сакаме да сториме сѐ што е можно за да спречиме да им биде нанесена штета и да ја интензивираме испораката на хуманитарна помош“, рече Блинкен.
Советникот на Белата куќа за национална безбедност Џејк Саливан на 12 ноември ги коментираше израелските напади на болницата во Газа.
„САД не сакаат да гледаат судири во болници каде цел се недолжни луѓе и пациенти и веќе разговаравме со израелските одбранбени сили по ова прашање“, рече Саливан.
Меѓутоа, оваа измена на дискурсот на американската администрација воопшто не влијаеше на Израел, а бројката на убиени луѓе во Газа од 7 октомври надмина 11.000.
САД не повикаа на прекин на огнот
И покрај цивилните жртви во Газа, САД и понатаму одбиваат јасно да повикаат на примирје.
Портпаролите на Белата куќа и на американското МНР како оправдување за тоа ја користат тезата дека „прекинот на огнот би му бил од корист на Хамас“.
И покрај фактот дека во израелските напади се убиени над 11.000 цивили и дека цел е цивилната инфраструктура, вклучувајќи и болници, сѐ уште нема критики или осуда на израелската Влада од страна на американската администрација.
САД испратија два воени брода
Американската администрација, која од почетокот на годината до 7 октомври на Израел му даде помош во висина од 3,8 милијарди долари, не даде точна бројка колку изнесува вкупната воена поддршка за Израел по тој датум.
Весникот „Волстрит журнал“ тврди дека на 31 октомври администрацијата на Бајден го известила Конгресот за испраќањето муниција во Израел во висина од 320 милиони долари.
Администрацијата на САД испрати два воени брода во регионот по 7 октомври и таму држи 2.000 војници подготвени за распоредување доколку е потребно.
Нова помош за Израел
Администрацијата на Бајден побара од Конгресот на САД да му даде помош на Израел во вредност од 14 милијарди долари.
Претставничкиот дом на американскиот Конгрес го одобри нацрт-законот со кој на Израел му се дава помош во висина од 14,3 милијарди долари, со тоа што предлог-законот бара средствата да се намалат од буџетот на американската Даночна служба, а демократите, вклучувајќи го и Бајден, се противат на овој закон.
