Израел му забрани на генералниот секретар на Обединетите нации влез во земјата, прогласувајќи го официјално за непожелен, изјави во средата министерот за надворешни работи.
„Генералниот секретар на ОН Антонио Гутереш го прогласив за персона нон грата во Израел и му забранив влез во земјата“, се вели во соопштението на Израел Кац.
Во последните месеци, Израел го забрани влезот на неколку претставници на ОН, вклучително и специјалниот известувач на ОН за Палестинците, Франческа Албанезе обвинета дека застанала на страната на Палестинците, како и на шефот на хуманитарната канцеларија на ОН на окупираната палестинска територија, кој во август рече дека Израел не ги продолжил визите поради извештајот на ОН во кој се обвинува Израел за кршење на правата на палестинските деца.
Израел, исто така, го нападна кредибилитетот на Палестинската агенција на ОН за бегалци (УНРВА).
Во обид да го оправда последниот потег, министерот за надворешни работи рече дека Гутереш не „недвосмислено го осудил“ Иран за ракетниот напад врз Израел од вторникот и исто така не ја назначил палестинската група на отпорот Хамас за „терористичка организација“.
Во вторникот, Иран истрела околу 180 проектили кон Израел, за што рече дека е одмазда за неодамнешните убиства на лидерот на Хамас Исмаил Ханије, на шефот на Хезболах Хасан Насрала и на командантот на иранската Револуционерна гарда.
Израел доцна во вторникот вети дека ќе одговори на нападот во време по сопствен избор, нарекувајќи го „сериозна, опасна ескалација“.
Регионалните тензии ескалираа поради речиси едногодишната немилосрдна офанзива на Израел на Појасот Газа, во која загинаа повеќе од 41.600 луѓе, главно жени и деца, по нападот на Хамас во октомври минатата година.
Конфликтот се прошири и во Либан, а Израел започна смртоносни напади низ целата земја во кои од 23 септември загинаа повеќе од 1.000 луѓе, а беа повредени речиси 3.000.
