Израел синоќа ослободи 30 Палестинци во најновата размена во рамките на договорот со палестинската група на отпорот, Хамас, јавува Анадолу.
Автобус на Црвениот крст го напушти израелскиот воен затвор „Офер“ во гратчето Беитонија во близина на Рамала на окупираниот Западен Брег, од каде што зеде 15 жени и 15 деца, јави дописникот на Анадолу.
Претходно истиот ден Хамас ги објави имињата на палестинските затвореници кои треба да бидат ослободени во рамките на договорот за размена меѓу Израел и палестинската група.
На списокот се најдоа имињата на 15 деца (12 од Ерусалим и три од Западниот Брег) и 15 жени (пет од Ерусалим и 10 од Западниот Брег).
Израелската војска претходно вчера извести за пристигнувањето на 12 заложници од Појасот Газа, од кои 10 Израелци и двајца Тајланѓани.
Оваа листа е петтата група палестински затвореници ослободени од израелските затвори во рамките на хуманитарната пауза во борбите меѓу Хамас и Израел во Појасот Газа.
Катар доцна во понеделникот објави договор за продолжување на првичната четиридневна пауза за дополнителни два дена, според кој продолжува понатамошната размена на затвореници.
Израел започна голема воена кампања во Појасот Газа по прекуграничниот напад на Хамас на 7 октомври.
Оттогаш во израелските напади загинаа 15.000 луѓе, од кои 6.150 деца и 4.000 жени, според здравствените власти во енклавата.
Бројот на загинати во Израел, според официјалните податоци, изнесува 1.200.
