Израелската Армија денес изврши напад на главната болница во Газа, Ал-Шифа, оставајќи голем број жртви меѓу многуте раселени Палестинци кои се засолниле во болницата, пренесува Анадолу.
Официјалната палестинска новинска агенција Вафа објави дека израелските воени авиони ја нападнале амбулантата во комплексот на болницата Ал-Шифа.
Се додава дека во израелскиот напад биле убиени и повредени десетици Палестинци, од кои повеќето деца и жени.
Сè уште не е потврден точниот број жртви бидејќи не е дадена изјава од здравствените власти.
Палестинските новинари кои беа во болницата објавија ужасни сцени на социјалните мрежи на кои се гледа нападот на болницата заедно со неколку мртви и повредени лица, од кои повеќето се деца и жени.
Речиси сите болници во опколениот Појас Газа беа под израелски воздушни напади во последните 24 часа, вклучително и Ал-Шифа, врз која беа забележани најмалку четири израелски воздушни напади во истиот период.
Нападите врз цивилните објекти како што се болниците, се забранети според правилата на војната. Израел тврди дека Хамас се засолнил во или околу болниците во Газа, но групите за човекови права не можат да го потврдат ова тврдење.
Израел започна немилосрдни воздушни и копнени напади врз Појасот Газа - вклучувајќи болници, резиденции и домови за богослужба - по прекуграничниот напад на палестинската група на отпорот Хамас на 7 октомври.
Убиени се најмалку 10.812 Палестинци, од кои 4.412 деца и 2.918 жени. Во меѓувреме, бројот на загинати во Израел е речиси 1.600, според официјалните бројки.
