Израел го нападна Хезболах вградувајќи експлозивен материјал во пејџери кои во Либан се увезени од Тајван, се вели во извештајот што се повикува на американски и други официјални лица.
„Њујорк тајмс“, повикувајќи се на официјални лица кои сакале да останат анонимни, објави дека либанската група ги нарачала пејџерите од тајванската компанија „Голд Аполо“, но тие биле неовластено манипулирани пред да пристигнат во Либан.
Повеќето од пејџерите биле од моделот AP924 на компанијата, иако пратката вклучувала и три други модели на „Голд Аполо“, додаваат тие.
Мали количества експлозивен материјал бил поставен покрај батеријата во секој пејџер, со вграден прекинувач што се активирал од далечина, рекле официјалните лица за Тајмс.
Во 15:30 часот по локално време во Либан, пејџерите добиле порака која изгледала дека е од раководството на Хезболах, но наместо тоа пејџерите експлодирале.
„Си-ен-ен“ објави дека Израел е одговорен за нападот.
Најмалку девет лица, вклучувајќи и едно дете, загинаа вчера од масовната експлозија на пејџери во различни области на Либан, потврди синоќа либанскиот министер за здравство Фирас ал-Абјад.
Тој додаде дека околу 2.800 луѓе се повредени, од кои 200 се во критична состојба.
Хезболах потврди дека најмалку двајца нивни членови загинале, а голем број се повредени од масовната експлозија на пејџери, и го обвини Израел за нападот, ветувајќи „праведна одмазда од неочекувани страни“.
Министерството за здравство на Либан претходно ги повика сите граѓани кои поседуваат пејџерски уреди за комуникација веднаш да ги фрлат.
