Либанските медиуми во вторникот објавија нови израелски прекршувања на договорот за прекин на огнот, додека жителите продолжија да се собираат за да се вратат во своите села во јужен Либан.
Државната новинска агенција ННА соопшти дека израелско беспилотно летало фрлило бомба во близина на група либански војници и цивили во пограничниот град Јарун.
Сѐ уште нема информации за повредени.
Засега нема коментар од либанската армија за инцидентот.
ННА соопшти дека израелската армија уништила неколку домови во градот Хула и детонирала експлозив во близина на џамија во градот Вазани во јужен Либан.
Според телевизијата, шест лица биле ослободени од израелската армија откако биле уапсени додека се обидувале да се вратат во нивните области во градовите Хула и Маркаба.
Во меѓувреме, либанските медиуми јавија дека големи толпи жители се собрале во близина на градовите Јарун и Марун Ел-Рас за да се вратат во своите домови во областа.
Тензиите ескалираа бидејќи израелската армија остана на либанска територија по 60-дневниот рок за нејзино повлекување од јужен Либан, кој помина во неделата според договорот за прекин на огнот.
Белата куќа, сепак, соопшти дека Израел и Либан се договориле за продолжување на рокот за израелското повлекување до 18. февруари.
Најмалку 26 лица се убиени, а 160 други се повредени од неделата од израелски војници кои отвриле огандодека жителите се обидувале да се вратат во своите села во јужен Либан, според локалните здравствени власти.
Кревкиот прекин на огнот е во сила од 27. ноември, завршувајќи го периодот на меѓусебно гранатирање меѓу Израел и групата Хезболах што започна на 8. октомври 2023 година, и ескалираше во целосен конфликт во септември минатата година.
Податоците од либанското Министерство за здравство покажуваат дека откако почна нападот на Израел против Либан во октомври 2023 година, загинаа најмалку 4.080 луѓе, меѓу кои жени, деца и здравствени работници, додека 16.753 се повредени.
