Израел во вторникот се закани дека ќе ѝ возврати на Туркије поради нејзината одлука да го ограничи извозот на одредени стоки, велејќи дека „ќе се обратат до произраелските земји и организации во САД да ги запрат инвестициите во Туркије и да спречат увоз на производи од Туркије“.
„Израел ќе контактира со земји и организации во САД за да ги запре инвестициите во Туркије и да го спречи увозот на производи од Туркије и со нашите пријатели во американскиот Конгрес да го испитаат прекршувањето на законите за бојкот и соодветно да воведат санкции кон Туркије“, објави министерот за надворешни работи Израел Кац на X.
Во соопштението на канцеларијата на Кац се вели дека тој ѝ наредил на економската канцеларија на Министерството за надворешни работи да подготви обемна листа на производи кои Израел ќе спречи Туркије да ги извезува во Израел.
„Туркије еднострано ги прекршува трговските договори со Израел и Израел ќе ги преземе сите неопходни мерки против тоа“, се вели во соопштението.
Кац, исто така, тврди дека турскиот претседател Реџеп Таип Ердоган уште еднаш ги жртвува економските интереси на народот на Туркије за неговата поддршка на Хамас, кој тој ги нарече „убијци во Газа кои силувале, убивале и сквернавеле тела на жени, девојки и живи изгорени деца“, осврнувајќи се на извештаите од прекуграничниот напад на Хамас од 7 октомври, вклучително и детали што Хамас ги оспорува.
„Израел нема даподлегне на насилство и уцени и нема да се жали на едностраното кршење на трговските договори и ќе преземе паралелни мерки против Туркије кои ќе и наштетат на турската економија“, вети Кац.
Претходно во вторникот, Туркије го ограничи извозот на одредени производи во Израел сѐ додека не го спроведе прекинот на огнот и не дозволи доволен и непрекинат проток на хуманитарна помош во Појасот Газа.
„Израел продолжува флагрантно да го крши меѓународното право и ги игнорира бројните повици на меѓународната заедница за прекин на огнот и непрекината хуманитарна помош“, се вели во соопштението на турското Министерство за трговија.
Израел уби повеќе од 33.000 Палестинци од прекуграничниот упад на 7 октомври на палестинската група Хамас, кој однесе 1.200 животи.
Оттогаш, голем дел од инфраструктурата на Газа е уништена, а 1,9 милиони нејзини жители насилно се раселени, оставајќи ги во опасност од болести и глад.
Израел е обвинет за геноцид пред Меѓународниот суд на правдата (МСП), кој во јануари донесе привремена одлука со која му нареди на Тел Авив да ги запре геноцидните акти и да преземе мерки за да се гарантира хуманитарна помош за цивилите во Газа.
