Израелскиот премиер Бенјамин Нетанјаху потврди дека палестинската група Хамас ги прекршила условите од договорот за размена на затвореници со предавање на тело на неидентификувана жена од Газа наместо телото на заложничката Шири Бибас, јавува Анадолу.
Нетанјаху вети дека Хамас „ќе ја плати целосната цена“ за, како што рече, „сериозното прекршување“ на договорот за размена на затвореници.
Хамас соопшти дека вчера според договорот за прекин на огнот во Газа и размена на затвореници ги предал телата на Бибас и нејзините две деца, Ариел и Кфир, како и телото на Одед Лифшиц.
Хамас соопшти дека израелските заробеници биле убиени во неселективните воздушни напади од Тел Авив за време на 15-месечниот геноцид во енклавата.
„По завршувањето на процесот на идентификација од страна на Националниот институт за судска медицина во соработка со израелската полиција, претставниците на ИДФ го информираа семејството Бибас дека нивните најблиски, Ариел и Кфир Бибас, се идентификувани“, соопшти израелската армија.
Се додава и дека „за време на процесот на идентификација е утврдено дека другото тело што е примено не е на Шири Бибас ниту на другите преостанати заложници“.
