Израелската армија денес потврди дека убила 15 членови на Хезболах во воздушен напад врз општинска зграда во јужен Либан.
Во соопштението се вели дека нападот бил насочен кон Општината Бинт Џбеил доцна синоќа, тврдејќи дека во зградата имало складирано оружје.
Армијата соопшти дека нејзините воени авиони погодиле околу 200 цели на Хезболах во Либан.
Нема коментар од Хезболах за израелското тврдење.
Израелската армија денес започна нов бран воздушни напади во Бејрут и неколку градови во јужен и источен Либан.
Хезболах објави дека со ракети ги гаѓал израелските војници во населбите Саса и Шумера во северен Израел.
Израел започна со масовни воздушни напади на 23 септември врз, како што ги нарекува, локации на Хезболах низ Либан, во кои загинаа повеќе од 1.100 лица, а над 3.000 беа повредени, според либанското Министерство за здравство.
Воздушната кампања беше ескалација на едногодишната прекугранична војна меѓу Израел и Хезболах од почетокот на бруталната офанзива на Тел Авив врз Појасот Газа, во која се убиени речиси 41.800 луѓе, главно жени и деца, од нападот на Хамас минатата година.
Најмалку 1.928 луѓе оттогаш се убиени, над 9.200 се повредени, а 1,2 милиони други се раселени, според либанските власти.
Меѓународната заедница предупреди дека израелските напади во Либан би можеле да го ескалираат конфликтот во Газа во поширока регионална војна.
