Роднините на израелските заложници одржаа протест со барање за продолжување на договорот за размена на заробеници меѓу Израел и Хамас.
Демонстрантите кои бараат Владата на Нетанјаху да го заврши договорот за размена на затвореници со Хамас и да ги врати израелските затвореници кои се држат во Газа, го блокираа Автопатот број 1 што ги поврзува Ерусалим и Тел Авив.
Протестот се одржа поради суспензијата на размената на затвореници, а демонстрантите апелираа до Владата да се придржува до договорот.
Десетици луѓе држеа транспарент на кој пишуваше: „Оставањето заложници е воено злосторство“, пишува Тајмс оф Израел, додавајќи дека демонстрантите палеле жолти димни бомби додека го блокирале автопатот.
Тие бараат Нетанјаху да престане да го загрозува договорот и да испрати тим во Доха за да преговара за втората фаза од прекинот на огнот, што ќе доведе до ослободување на преостанатите заложници одеднаш.
Хамас вчера најави дека ќе го одложи ослободувањето на израелските заложници, закажано за сабота, бидејќи, како што тврди, Израел ги прекршил условите од договорот за прекин на огнот.
Израелска делегација се врати од Доха, каде викендов се водеа преговори за следната фаза од прекинот на огнот во Појасот Газа, објави вчера портпаролот на израелскиот премиер Бенјамин Нетанјаху, без да соопшти детали за преговорите.
Израел и Хамас постигнаа прекин на огнот во средината на јануари по повеќе од една година конфликт, потсетува Гардијан.
Првата фаза од прекинот на огнот, од трите планирани, вклучува прекин на непријателствата, ослободување на некои затвореници, повлекување на израелските сили од Газа и враќање на Палестинците во северниот дел на Газа, заедно со приливот на хуманитарна помош.
Втората фаза предвидува прекин на огнот за 42 дена.
Во третата фаза Хамас ќе ги врати телата на загинатите заложници од Газа во Израел, Израел ќе ослободи уште затвореници, а треба да започне и петгодишен план за реконструкција.
