Израелскиот министер за одбрана Израел Кац денеска и наложи на израелската армија да остане стационирана во тампон зоната на сириската страна на планината Хермон во текот на зимата. Ова следува откако војската ја окупира областа на 8 декември, денот кога антирежимските сили во Дамаск го принудија Башар ал Асад да побегне во Русија.
„Поради она што се случува во Сирија, нашето одржување на врвот Хермон има огромно безбедносно значење. Мора да се направи сè за да се обезбеди подготовка на израелската армија во областа, дозволувајќи им на војниците да останат во суровите временски услови”, рече Кац.
Одлуката за продолжување на престојот на армијата во окупираната зона дојде откако Кац, началникот на Генералштабот Херци Халеви и други воени претставници се состанаа вчера за да ја проценат ситуацијата во Сирија.
Силите на израелската армија влегоа 2-10 километри длабоко во демилитаризираната тампон зона долж границата со Сирија, велат извори кои сакаат да останат анонимни.
Тој, сепак, од безбедносни причини одби да ги прецизира сириските села во тампон зоната каде што се распоредени израелските сили.
Доскорешниот сириски лидер Башар ал Асад по речиси 25 годишно владеење и 13 годишна граѓанска војна побегна во Русија.
Според Силите за набљудување на ОН (УНДОФ), тампон зоната се протега преку 75 километри во должина и се движи во ширина од приближно 10 километри во центарот до 200 метри на далечниот југ.
