Образованието, како и сите други сфери на животот, претрпе огромни штети од континуираните напади на израелската армија врз Појасот Газа, кои траат повеќе од една година, предизвикувајќи вистинска хуманитарна катастрофа во регионот.
Во Појасот Газа, каде училиштата преку ноќ мораа да ги затворат вратите за учениците и станаа засолништа за раселените Палестинци, наставата се одржува во шатори, но се обезбедуваат само ограничени услуги, благодарение на напорите на волонтерите.
Во нападите на израелската армија во Појасот Газа и окупираниот Западен Брег, досега загинаа 12.061 палестински ученик и студент, а 19.467 се повредени.
Во соопштението на палестинското Министерство за образование и високо образование, се наведува дека бројот на убиени ученици во Газа, која е под израелски напади од 7 октомври 2023 година, достигна 11.946, а бројот на повредени 18.858.
На Западниот брег, каде што израелската армија ги засили нападите по 7 октомври минатата година, загинаа 115 палестински ученици, 609 беа повредени, а 466 се приведени.
Во Појасот Газа и на Западниот Брег, исто така загинаа 564 наставници и друг училиштен персонал, а 3.729 беа повредени.
Бројот на наставници и персонал приведени од израелската армија на окупираниот Западен Брег е 153.
Израелската армија бомбардираше 502 државни училишта, универзитети и образовни институции во Појасот Газа и 65 училишта кои работат во рамките на Агенцијата за помош и работа на Обединетите нации (ОН) за палестинските бегалци на Блискиот Исток (УНРВА).
Многу училишта и образовни институции во Појасот Газа беа целосно уништени во бомбардирањето на израелската армија.
Исто така, за време на рации и напади, израелската армија уништи 91 училиште и седум универзитети на окупираниот Западен Брег.
Израелската армија бомбардирала и училишта во кои се засолниле раселените Палестинци.
Според УНРВА, цел биле 70 отсто од училиштата на УНРВА во Појасот Газа.
Според палестински извори, околу 788 илјади ученици и студенти немаат пристап до настава поради израелските напади во Појасот Газа.
Посочувајќи на последиците од израелските напади, се наведува дека мнозинството палестински ученици и студенти во Газа доживеале психолошка траума.
Израел ја продолжи својата разорна офанзива врз Појасот Газа по нападот на Хамас минатиот октомври и покрај резолуцијата на Советот за безбедност на Обединетите нации со која се бара итен прекин на огнот.
Оттогаш, според локалните здравствени власти, повеќе од 43.600 луѓе, главно жени и деца, се убиени, а речиси 103.000 се повредени.
Израел беше обвинет за геноцид пред Меѓународниот суд на правдата за неговите постапки во Појасот Газа.
Расте тензиите и на окупираниот Западен Брег поради бруталната израелска офанзива на Појасот Газа.
Најмалку 780 Палестинци досега се убиени, а речиси 6.300 се ранети од оган на израелската армија на окупираниот Западен Брег, соопшти палестинското Министерство за здравство.
