Израелската армија денеска го откажа заминувањето на војниците за Газа и ја зголеми состојбата на готовност меѓу своите сили стационирани во Газа, подготвувајќи се за потенцијално обновување на конфликтот доколку примирјето пропадне, јавуваат израелските медиуми.
Одлуката била донесена откако Хамас најави одложување на ослободувањето на израелските заложници.
Сепак медиумите известуваат дека високи израелски воени функционери посочиле дека не се очекува воена акција доколку не стане јасно дека Хамас не се придржува до договорот за прекин на огнот.
Денеска военото крило на Хамас, Бригадите Ал-Касам, објави дека го одложува ослободувањето на израелските заложници закажано за сабота, наведувајќи ги тековните прекршувања на договорот за прекин на огнот од страна на Израел како причина за одложувањето.
Договорот за прекин на огнот во три фази е во сила во Газа од 19 јануари, со што е запрена геноцидната војна на Израел во која загинаа повеќе од 48.000 луѓе и ја остави енклавата во урнатини.
Во првата фаза од примирјето, што трае до почетокот на март, треба да бидат ослободени 33 израелски заложници во замена за голем број палестински затвореници. Шестата размена меѓу Израел и Хамас беше закажана оваа недела.
Меѓународниот кривичен суд издаде налози за апсење во ноември минатата година за Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата за неговата војна против енклавата.
