Израелски тенк во средата пукаше врз набљудувачката станица на мировните сили на Обединетите нации (ОН) во Кафр Кила во јужен Либан, објави УНИФИЛ.
„Утринава, мировниците на позиција во близина на Кафр Кила забележаа дека тенк Меркава на ИД (израелската армија) пука на нивното набљудувачко место“, се вели во соопштението на Привремените сили на ОН во Либан (УНИФИЛ).
Се додава дека се уништени две камери, а кулата е оштетена. Мировниците го опишуваат како „директен и јасно намерен“ напад на позицијата на УНИФИЛ.
УНИФИЛ ја потсетува израелската армија и сите актери на нивните обврски „да ја осигураат безбедноста на персоналот и имотот на ОН и да ја почитуваат неповредливоста на просториите на ОН во секое време“.
Во текот на изминатата недела, Израел постојано ги гаѓаше позициите на УНИФИЛ во јужен Либан, што предизвика светска осуда и страв од неговите поголеми воени планови.
Од 23 септември, Израел започна масовни воздушни напади низ Либан против, како што вели, цели на Хезболах, при што загинаа повеќе од 1.500 луѓе и беа раселени повеќе од еден милион.
Воздушната кампања претставува ескалација на едногодишната прекугранична војна меѓу Израел и Хезболах од почетокот на бруталната израелска офанзива на Појасот Газа во која загинаа повеќе од 42.400 луѓе, главно жени и деца, од нападот на Хамас минатата година.
И покрај меѓународните предупредувања дека регионот на Блискиот Исток е на работ на регионална војна поради немилосрдните напади на Израел врз Газа и Либан, Израел го прошири конфликтот со започнување копнена инвазија на јужен Либан на 1 октомври.
