Израелските војници убиле едно палестинско момче и раниле уште две лица за време на рација во градот Дура во Хеброн на окупираниот Западен Брег.
Во соопштението на палестинското Министерство за здравство се наведува дека израелски војници го убиле Палестинецот Махмуд Ибрахим ал-Хуруб (18).
Како што јави палестинската новинска агенција ВАФА, во градот Дура избувнал конфликт меѓу Палестинците и израелските војници кои го нападнале градот.
Се додава дека израелските војници употребиле боеви куршуми, шок-бомби и солзавец против Палестинците, а Палестинците возвратиле со камења.
Тензиите се зголемуваат низ Западниот Брег откако Израел започна смртоносна воена офанзива на Појасот Газа во која загинаа повеќе од 40.000 луѓе од 7 октомври 2023 година, по нападот на Хамас.
Оттогаш, најмалку 630 Палестинци се убиени, а речиси 5.400 се ранети од оган на израелската армија на окупираната територија, соопшти палестинското Министерство за здравство.
