Израелската организација за човекови права Б'Целем го објави сведочењето на палестинскиот адвокат Сари Хурија, кој го опиша третманот на палестинските затвореници во израелскиот затвор Мегидо.
Хурија рече дека израелските чувари ги принудувале некои палестински затвореници „да лаат како кучиња“.
„Ако одбивале, ги тепале додека не почнале да лаат“, додаде тој.
Како што рече, младите палестински затвореници биле „тепани и понижувани“, „младите момчиња биле принудувани да го бакнуваат израелското знаме на ѕидот“.
„Сите што одбиле биле малтретирани. Еден од чуварите сликал еден од затворениците како го бакнува знамето. Постојано биле тепани, навредувани и понижувани“, вели адвокатот во своето сведочење.
Во меѓувреме, израелската армија продолжува со бомбардирање на Појасот Газа. Во градот Газа беше извршен напад врз стан во областа Туфа, при што загинаа три члена на исто семејство, маж со сопругата и синот, јави палестинската новинска агенција ВАФА.
Истовремено, Израел бомбардираше куќи во бегалскиот камп Бурејџ, куќа на влезот во бегалскиот камп Нусејрат, населби во Газа Сити, Тал ал Хава и Зејтун и областа северозападно од кампот Нусејрат.
Според податоците на Министерството за здравство во Газа, Израел од 7 октомври таму убил 39.653 луѓе, меѓу кои повеќе од 16.000 деца. Повеќе од 10.000 луѓе исчезнаа. Повредени се најмалку 91.535 луѓе.
