Израел ќе остави мал број војници на пет стратешки локации во јужен Либан, откако утре истекува рокот за повлекување на израелските војници како дел од примирјето со Хезболах, изјави денеска портпаролот на израелската армија Надав Шошани.
„Треба да останеме на тие точки во овој момент за да ги одбраниме израелските граѓани, да се увериме дека овој процес е завршен и на крајот да им го предадеме на либанските вооружени сили“, рече Шошани.
Тој исто така рече дека потегот е во согласност со договорот за прекин на огнот меѓу Израел и Хезболах, пишува Тајмс оф Израел.
Претходно денеска, неименуван израелски претставник изјави дека ИД ќе се повлече од Либан и ќе ги исполни условите од договорот за прекин на огнот.
Првичниот рок за повлекување на израелската војска беше крајот на јануари, но под притисок на Израел, Либан го продолжи рокот до 18-ти февруари.
И покрај потпишувањето на договорот за прекин на огнот, Израел продолжи да изведува воздушни напади во јужен и источен Либан, велејќи дека цели на „воени локации со проектили и борбена опрема“.
Според условите на примирјето со посредство на САД во ноември минатата година, израелските војници добија 60 дена да се повлечат од јужен Либан, каде што од почетокот на октомври минатата година водеа копнена офанзива против членовите на Хезболах поддржан од Иран.
