Израелските војници убиле 19-годишен Палестинец во рација која се случила пред зори на окупираниот Западен Брег, соопшти палестинското Министерство за здравство, додека насилството на окупираната територија не покажува знаци на попуштање.
Министерството соопшти дека Дургам ал Ахрас бил убиен во судир со израелските војници кои го нападнале бегалскиот камп Акабат Џабер во близина на Ерихон за да извршат апсења рано утрото во средата.
Израелската армија засега нема коментар.
Убиството следи еден ден откако израелските сили убија уште четворица Палестинци, тројца за време на напад со дрон во бегалскиот камп Џенин на окупираниот Западен Брег и еден во опколената Газа.
Израел го окупира Западниот Брег од 1967 година, а неговите војници рутински вршат упади во области како Џенин, кои номинално се под безбедносна контрола на палестинската управа.
Израелската армија во јули го изврши својот најголем напад на кампот Џенин во последните неколку години, а во кој беа убиени 13 Палестинци, меѓу кои и деца.
Насилството поврзано со израелско-палестинскиот конфликт се зголеми од почетокот на минатата година, особено на Западниот Брег.
Најмалку 238 Палестинци се убиени досега годинава во инциденти поврзани со конфликтот.
Во крвопролевањето, исто така, се убиени 32 Израелци, Украинец и Италијанец, според извештајот на АФП заснован на официјални извори од двете страни.
Тие, од палестинска страна вклучуваат борци, како и цивили, а од израелска страна, тројца припадници на арапското малцинство.
