По убиството на шефот на Хамас, Исмаил Ханије, Катар денес ја доведе во прашање сериозноста на Израел во однос на преговорите за прекин на огнот што со месеци се водат меѓу Израел и Хамас.
Осврнувајќи се на убиството на Ханије и континуираното таргетирање на цивилите во Газа од страна на Израел, катарскиот премиер Шеик Мохамед бин Абдулрахман Ал Тани рече: „Како може да успее посредувањето (за прекин на огнот Израел-Хамас) кога едната страна ќе го убие преговарачот од другата страна?“.
Тој додаде дека „на мирот му се потребни сериозни партнери и глобален став против непочитувањето на човечкиот живот“.
Претходно Министерството за надворешни работи на Катар остро го осуди израелското убиство на Ханије, сметајќи го за „грозоморно злосторство (...) и флагрантно кршење на меѓународното право“.
Индиректните разговори меѓу Израел и Хамас со посредство на САД, Катар и Египет не успеаја да постигнат договор за траен прекин на огнот што овозможува размена на затвореници меѓу Израелците и Палестинците.
Напорите на трите земји да посредуваат во постигнувањето договор меѓу Израел и Хамас досега беа попречени поради отфрлањето од страна на Нетанјаху на повикот на Хамас за прекин на непријателствата.
Рано денес Хамас објави дека Исмаил Ханије бил убиен во израелски воздушен напад врз неговата резиденција во Техеран.
Иранската државна телевизија ја потврди смртта на Ханије, велејќи дека истрагата е во тек и дека наскоро ќе бидат објавени резултатите.
Израел допрва треба да даде официјална изјава во врска со воздушниот напад врз резиденцијата на Ханијe во Техеран.
