„Неприфатливо е Израел да продолжи со планираната инвазија на Рафах, бидејќи таква операција би била погубна за Палестинците, изјави во понеделникот министерката за надворешни работи на Канада, Мелани Џоли.
Израел предупреди околу 1 милион Палестинци да ја напуштат областа поради планираната инвазија иако Рафах е едно од последните безбедни места во Газа.
Израел изврши воздушни напади на Рафах во понеделникот и успеа да ослободи двајца израелски заложници, но за време на операцијата беа убиени околу 70 Палестинци.
„Многу сум загрижен за тоа што се случува во Газа, особено во Рафах“, им рече Џоли на новинарите во Отава. „Операцијата би била катастрофална и е погубна за Палестинците и сите оние кои бараат засолниште“.
Палестинците се селат од своите домови и бегаат од израелските напади кои започнаа откако Хамас уби 1.200 Израелци и зеде околу 250 заложници на 7 октомври. Израел возврати со одмазда и повеќе од 27.000 Палестинци беа убиени. Нападот на Рафах би бил погубен за Палестинците кои немаат веќе места каде да одат.
„Она што владата на Нетанјаху го бара од Палестинците да го направат, а тоа е повторно да си заминат, е неприфатливо“, рече Џоли. „Тие немаат каде да одат и затоа ни треба сега насилството да престане.
„Потребен ни е одржлив прекин на огнот. Ни треба договор за заложници. Заложниците мора да бидат ослободени и хуманитарната помош мора да стигне до таму“.
Џоли во вторник ќе биде во Вашингтон на разговори со американскиот државен секретар Ентони Блинкен. Јорданскиот крал Абдула се состана со американскиот претседател Џо Бајден во Вашингтон во понеделникот, а во среда треба да ја посети Канада.
Израел е обвинет за геноцид пред Меѓународниот суд на правдата, кој во привремената одлука рече дека тврдењата на Јужна Африка во случајот поднесен во декември се веродостојни.
Во својата јануарска пресуда, судот нареди привремени мерки за израелската влада да се откаже од геноцидните акти и да преземе мерки за да се гарантира хуманитарна помош за цивилите во Газа.
