Израел ќе ја продолжи војната во Газа „со или без меѓународна поддршка“, изјави во средата израелскиот министер за надворешни работи Ели Коен.
Говорејќи за време на состанокот со австралискиот заменик-министер за надворешни работи Тим Вотс во Западен Ерусалим, Коен рече дека прекинот на огнот во Газа ќе биде подарок за Хамас, „и ќе му дозволи да се врати и да им се заканува на жителите на Израел“.
Американскиот претседател Џо Бајден во вторникот рече дека Израел ја губи поддршката ширум светот и дека премиерот Бенјамин Нетанјаху „мора да ја зајакне и промени“ својата влада.
„Ова е најконзервативната влада во историјата на Израел“, рече Бајден на кампањата за собирање средства во Вашингтон, додавајќи дека владата на Нетанјаху „не сака решение со две држави“.
Израел го бомбардираше Појасот Газа од воздух и од копно, воведе опсада и изврши копнена офанзива како одмазда за прекуграничниот напад на Хамас на 7. октомври.
Најмалку 18.608 Палестинци се убиени, а 50.594 повредени во израелскиот напад оттогаш, според здравствените власти на Газа.
Бројот на израелски загинати во нападот на Хамас изнесуваше 1.200, додека околу 139 заложници останаа во заробеништво, според официјалните податоци.
