Претставничкиот дом на САД доцна во вторникот гласаше за осуда на пратеничката Рашида Тлаиб поради нејзините критики на Израел поради конфликтот во Газа.
Резолуцијата, предложена од републиканскиот пратеник Рич Мекормик, беше изгласана во Претставничкиот дом со 234 гласа ЗА и 188 ПРОТИВ. Дваесет и двајца демократи гласаа заедно со републиканците да ја укорат Тлаиб додека четворица пратеници беа ВОЗДРЖАНИ.
Резолуцијата ја обвинува Тлаиб, единствениот палестинско-американски член на Конгресот, за „промовирање на лажни наративи во врска со нападот на Хамас врз Израел на 7 октомври 2023 година и за повикување на уништување на државата Израел“.
Контроверзноста дополнително ја подгреа видеото кое таа го сподели на социјалните мрежи во кое беше вклучен слоганот „Од реката до морето, Палестина ќе биде слободна“.
Тлаиб емотивно реагираше за време на нејзиниот говор среде дебатата за резолуцијата за нејзина осуда.
„Не можам да верувам дека мораме да го кажеме ова, но палестинскиот народ не е за еднократна употреба“, рече конгресменката што го претставува Мичиген.
„Ние сме луѓе исто како и сите други. Држејќи фотографија Тлаиб продолжи: „Мојата баба, како и сите Палестинци, само сака да го живее својот живот во слобода и човечко достоинство што сите го заслужуваме“.
„Да се зборува за спасување животи- без разлика на вера, без разлика на етничката припадност - не треба да биде контроверзно во оваа институција. Плачот на палестинските и израелските деца не ми звучат поинаку. Она што не го разбирам е зошто плачот на Палестинските деца ви звучи поинаку на сите. Не можеме да ја изгубиме нашата заедничка хуманост“, додаде таа.
Конгресменката нагласи дека нејзините критики отсекогаш биле насочени кон израелската влада и постапките на израелскиот премиер Бенјамин Нетанјаху.
Првата резолуција минатата недела, беше поништена од демократите во Претставничкиот дом со поддршка на некои републиканци.
