Портпаролот на Кремљ, Дмитриј Песков во петокот ги критикуваше изјавите на американскиот претседател Џо Бајден за рускиот претседател Владимир Путин како „неприфатливи“.
На прес-конференција во Москва, Песков нагласи дека кога Бајден „зборува со толку непочитување за лидерите на другите земји“, тој „покажува однесување што е апсолутно неприфатливо за шеф на држава“.
„Се осврнувам на неговите изјави за претседателот Путин. Тоа за нас е неприфатливо. Тоа е нешто на што директно обрнуваме внимание и го сметаме за апсолутно неприфатливо“, нагласи тој.
Песков одби да коментира дали лапсусите на Бајден би можеле да влијаат на неговите шанси да биде номиниран за реизбор, велејќи: „Американските гласачи нека ги одредат шансите на кандидатот“.
„Забележавме, како и целиот свет. Јасно е дека тоа се лапсуси. Тие добија толку широк одговор поради домашните политички дискусии што моментално се водат во САД. Но тоа не наша работа, тоа е интерна работа на САД“, рече тој.
На самитот на НАТО во Вашингтон, Бајден по грешка го нарече украинскиот претседател Зеленски „претседател Путин“.
Песков негираше дека Путин му испратил порака на Доналд Трамп преку унгарскиот премиер Виктор Орбан, нагласувајќи дека нема „ниту писмени, ниту вербални“ пораки за поранешниот американски претседател.
Во врска со повикот на Киев до земјите од НАТО да ги укинат ограничувањата за ракетни напади врз Русија, Песков рече дека оружјето произведено во земјите на НАТО веќе ја погодува руската територија.
Официјалниот претставник предупреди дека евентуалното зголемување на опсегот на таквите напади би претставувало „провокација што ќе доведе до ескалација на тензиите“.
Тој ги отфрли тврдењата за руски обид за атентат врз шефот на германскиот производител на оружје Рајнметал, Армин Папергер, наведувајќи дека таквите извештаи не можат да се сфатат сериозно.
