Рускиот министер за надворешни работи Сергеј Лавров изјави дека она што Израел го прави во Газа е колективно казнување, што е спротивно на меѓународното хуманитарно право, известува Анадолу.
Нагласувајќи дека „меѓународната заедница не реагирала на ситуацијата во Газа“, Лавров, на прес-конференција во седиштето на ОН во Њујорк, рече дека не е спроведена ниту една од резолуциите на Советот за безбедност на ОН по ова прашање.
Наведувајќи дека се неприфатливи нападите што се спроведуваат од 7 октомври, Лавров истакна: „Она што Израел го прави во Газа е колективно казнување“.
Тој нагласи дека колективното казнување е кршење на меѓународното хуманитарно право и додаде: „Не можете да се борите против прекршувањата со правење други прекршувања“.
Обвинувајќи ја Канцеларијата на генералниот секретар на ОН дека применува „двојни стандарди“, Лавров рече дека кога зборувале за нападите врз Газа, не кажале јасно кој го извршил нападот, но кога станува збор за Украина, веднаш ја обвиниле Русија.
Лавров посочи на обврската на персоналот на ОН да биде непристрасен кон сите членки.
Запрашан за тензиите на Блискиот Исток и можноста за иранско мешање, Лавров рече: „Иран не сака да ги зголемува тензиите, Израел сака“.
Шефот на руската дипломатија рече дека Хезболах исто така дејствувал воздржано, но САД и Израел се обидуваат да го поттикнат конфликтот и да започнат „сеопфатна војна“.
Министерот Лавров рече дека Западот треба да ги вложи сите неопходни напори за намалување на тензиите.
